This text is part of:
Click on a word to bring up parses, dictionary entries, and frequency statistics
30. consul compositis rebus Cephallaniae, praesidio Samae imposito, in Peloponnesum iam diu
accersentibus Aegiensibus maxime ac Lacedaemoniis traiecit.
[2]
Aegium a principio Achaici concilii
semper conventus gentis indicti sunt, seu dignitati
urbis id seu loci opportunitati1 datum est.
[3]
hunc morem Philopoemen eo primum anno labefactare
conatus legem parabat ferre, ut in omnibus civitatibus quae Achaici concilii essent in vicem conventus
agerentur.
[4]
et sub adventum consulis damiurgis
civitatium, qui summus est magistratus, Aegium
evocantibus Philopoemen—praetor tum erat—Argos
conventum edixit.
[5]
quo cum appareret omnes ferme
conventuros, consul quoque, quamquam Aegiensium
favebat causae, Argos venit; ubi cum disceptatio
fuisset, et rem inclinatam cerneret, incepto destitit.
[6]
Lacedaemonii deinde eum in sua certamina
[p. 102]
averterunt. sollicitam eam civitatem exules maxime2 habebant, quorum magna pars in maritimis Laconicae
orae castellis, quae omnis adempta erat,3 habitabant.
[7]
id aegre patientes Lacedaemonii, ut aliqua liberum ad mare haberent aditum, si quando Romam aliove
quo mitterent legatos, simul ut emporium et receptaculum peregrinis mercibus ad necessarios usus
esset, nocte adorti vicum maritimum nomine Lan4 improviso occupaverunt.
[8]
vicani quique ibi exules habitabant primo inopinata re territi sunt; deinde sub lucem congregati levi certamine expulerunt Lacedaemonios.5
[9]
terror tamen omnem maritimam oram pervasit, legatosque communiter et castella omnia vicique et exules, quibus ibi domicilia erant, ad Achaeos miserunt.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.