Bonifacio Veronese Verona saec. XIII in. - Perugia? 1293, Eulistea, Eulistea Eulistea Eulistea (F. Bonaini, A. Fabretti, F. Polidori, 1985)

Questibus inpliciti variis, et fletibus acti,
Tunc urbis cives aiunt: -Post verba Quiritis,
Unde, pater, celi rabies, ac unde ruine
Hec totiens misse? Medio fortuna malorum
5Nos statuit, cumque malis servavit in esse.
Obsidione data memoramus, et agmina vallis
* * *
Inde Spotelane magne capitaneus urbis.
Tunc Eulistee sensu virtute nitescens,
Sedator litis, populi placator et ire;
Armigerosque solet Perusina requirere turma
5Qui presint aliis Latialis gentibus ore.
Hoc virtus prestat; colles et plana quiescant
Illius aspectu, viridaria qualia nulla
Terra solet; segetum cultus, vinetaque pulcra,
Et fontes, nulli quales struxere coloni.
10Illic Griphonis estque Leonis ymago
Aurea, diverse forme, varieque figure.
Hinc hominum vultus, faties ac ardua molles;
Omne quod est placidum, seu delectabile visu,
In te conspicitur, sedes altissima rebus,
15Dulcis, amena satis, solide tranquilla quietis.
Admodo Corgnensis requiescere carmina Guido
Pace sines tu, Gripho placens, seu polo noster,
Pro populo quam vota tenens, que sepe rogasti,
Et populus contentus erit que duximus ipso.
20Quesisti quotiens genuit que patria vatem,
Quis ne casus agat, aut que me fata fatigant,
Que sint exilii, seu vestri causa pericli;
Expediam breviter. Sed tu privatis honore,
O Gripho, scribi facies in marmore vivo
25Quatuor ista meo tumulo que metra secuntur:
"Me Verona tulit; me repulit inde tyrannus
Ecelinus atrox. Aquilas et lilia scripsi,
Divinos apices Griphonis et arma potentis,
Gestaque multorum quorum sua fata per orbem".
30Ac mea pervigeat veneranda figura theatro,
Illius et tituli prescriptio parte notetur
Versiculis annexa tribus, que talis habetur:
"Hic est qui cecinit Perusine prelia gentis;
Gloria Verone nusquam moritura, sed evo
35Perpetua virens, Griphone superstite secum".
Clareat ad dextra primum benedictio missa
Presulis illa tui: longe cum principe claro
Exeat in mundum, nec eat delebilis usquam
Bulgarus annexus edetis et lauribus evi.
40Non retro linquendus erat Barone, coruscans
Militie titulo Perusine, maximus urbis
Rector et illustris, Miniato proditus almo,
Progenies cuius de Mangiatoribus extat.
Illic Tantibene, qui de Cruce strenuus heres
45Dictus erat; quem iura satis legumque profunda
Insigni titulo dotant, et dote verenda.
Ac tua fama vigens fuerit diffusa per orbem,
O Tribalde placens, quem legum summa decorat:
Illic dux patrie, Gotius preclarus, et heros;
50Qui trahit ultra foro cognomina, prole resurgens
Eximia, iuvenis solers, et floribus actu;
Ille suo morum redolenti fultus honore,
Nec non virtutum precinctus culmine summo.
Uguitionis ibi Thomas, qui maximus ibat
55Consul in urbe sua; prudens, facundus et expers,
Eloquio placidusque suo, velut alter Ulixes.
Inde Iohannellus Bontempi, qui comes eius
Heserat offitio, sat providus atque benigna
Existens facie, pura quoque mente refultus.
60Ac tua fama vigens fuerit diffusa per orbem,
O Tribalde placens, quem legum summa decorat,
Ius et utrumque fovet, virtutum et gratia morum.
Multa referre vacat, mundi maxime princeps:
Sed numeris nunc parce meis, tu parce Camenis,
65Dum maiora tuis occurrent facta triumphis.
Detur ex gestis Motori gratia primo,
Virgineeque Dee, que tot dignata labores
Sumere, qua viguit ibi laurea nostra perhennis.
Sufficiat, nec plura modis Helicone noventur
70Pyeriis, sed fine dato deponere vela.
Victoribus pumpi subducere, carpere portu,
Gripho, tibi liceat, urbs et memorabilis, usque.
Hiis contenta vale, perque omnia climata currat
Nomen ubique tuum, vivatque per omnia tecum
75Secula vatis honos, et ad aurea regna polorum
Spiritus ascendat, eternaque lumina vite.