1
Huc huc, iambi! Arripite mi iam mordicus
Anum hanc furenti percitam libidine,
Tentiginosam, catulientem, spurcidam,
Gravedinosam, vietam, olentem, rancidam,
5Cadaverosam, fronte rugosa, coma
Cana atque rara, depilatis palpebris,
Glabro supercilio, labellis defluentibus,
Oculis rubentibus, genis lachrymantibus,
Edentulamque (ni duo nigri et sordidi
10Dentes supersint), auriculis exanguibus
Flaccisque, mucco naribus stillantibus,
Rictu saliva undante, tetro anhelitu,
Mammis senecta putridis praegrandibus
Araneosis deciduis inanibus,
15Laxoque ventre dissipato et fixili,
Cunno ulceroso, verminante podice,
Natibusque macris aridis et osseis,
Utroque sicco crure utroque brachio,
Talo genuque utroque procul extantibus,
20Calcaneoque pernionibus gravi;
Ut nil sit aspernabilius, nil tetrius
Monstrosiusque aut nauseabundum magis:
Quam pistor olim, caupo, calo, baiulus,
Et institores, et lanius, et carnifex,
25Et muliones permolebant et coci,
Ceu prostitutam et sellulariam meram;
Nunc nemo iam vult visere nemo colloqui,
Fastidit unusquesque et habet ludibrio
Anum subante perditam prurigine:
30Sed audet impudens tamen, audet impudens,
Procax, proterva, nec iam anus sed mortua,
Utcumque prurit (prurit autem iugiter),
Se postulare ut comprimam, sibi ut arrigam,
Quasi ipse verres quasi asinus sim vel canis.
35Abi hinc, abi, anus, in maximam malam crucem,
Abi scelesta, obscoena; sive vera anus
Seu terriculum es seu larva bustuaria.
Nam si optio mi detur, aedepol magis
Scrofam futuam quam te vel asinam vel canem.
This text is part of:
Click on a word to bring up parses, dictionary entries, and frequency statistics
1 in Anum
odae (I. Del Lungo, 1867).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.