1
Ut sonipes geminas attollit martius aures,
Cum raucae belli signa dedere tubae;
Sic mihi languenti surgunt in pectore vires,
Ingenii laudas cum monumenta mei.
5Et merito: neque enim, tanto sub iudice tutus,
Pertimeo vulgi scommata vana rudis.
Nam quoniam stygiam facile est tibi pellere mortem,
Quam facile invidiae frangere colla potes?
Felix cui liceat fati pervertere legem,
10Quem propter cymba stet leviore Charon,
Stamina qui valeas invita nectere Parca
Atque animas vacua restituisse colo.
Felix grata domus lycio Benivenia Phoebo,
Cui sua concessit munera cuncta Deus!
15Namque Coronidem tibi cedere iussit Apollo,
Iussit et aemonium cedere Phylliriden.
Ast alius simili frater virtute recenset
Quae medicam surgens herba ministret opem.
Tertius aoniis satur ille Hieronymus undis
20Ad querulam docto barbiton ore canit.
Bissenos alius modo cum trascenderit annos,
Pectore iam canos vincit et ore senes:
Cederet huic Thamyras docti certamine cantus,
Cederet aurata Calliopea lyra;
25Argumenta etiam logicis miranda figuris
Implicat, et magnum versat Aristotelem.
Di tibi dent pyliam longe superare senectam,
Antoni, euboicos et superare dies!
Di tibi dent geminos longum superesse parentes!
30Di servent fratres, pignora chara, tuos!
Tu modo praecipiti quae nuper carmina penna
Scripsimus, ingenii munera parva mei,
Excipe, meque tuum memori sub mente reconde,
Mutuaque alternus pectora servet amor.
This text is part of:
Click on a word to bring up parses, dictionary entries, and frequency statistics
1 ad Antonium Benivenium, medicum
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.