1
Si quod arcanis Helicon sub umbris
Carmen intactum fidibus priorum
Parturit, saxis iterum audiendum
Arboribusque;
5Quale nec triplex achelois ausa est
Cautibus virgo residens marinis,
Nec puer Phoebi Ciconum remoto
Dicere in antro;
Illud attritas repetita chordas
10Barbitos docto moduletur arcu,
Dulcis interpres animi piaeque
Conscia mentis.
Namque te rerum caput, Innocenti,
Turpe vulgato cecinisse plectro est,
15Cuius aurata triplices refulgent
Fronte coronae:
Roma cui paret dominusque Tibris,
Qui vicem summi geris hic Tonantis,
Qui potes magnum reserare et idem
20Claudere coelum:
Blanda cui vultu gravitas sereno
Ridet, invisos abigitque fastus,
Mitis et celsi radios potestas
Temperat oris.
25Sponte sublatos verecunda fasces
Deprimit virtus; apicata tristi
Nube maiestas caret, et decoro est
Splendida cultu.
Ergo formosam redit in iuventam
30Seque iam laetos parat ad triumphos
Roma, septenos hilaratque colles
Praeside tanto.
Urbsque quae Phryxi speculatur undas
Exuet saevas propere catenas,
35Ac suas nobis opulenta palmas
Mittet Idume:
Quippe concordes animos manusque
Devovent reges tibi, seque ad arma
Concitat turci sitiens cruoris
40Vesper et Arctos.
Scilicet tales meditatus annos
Iuppiter fesso comes it parenti,
Quo tibi felix simul atque faustum
Proroget aevum.
This text is part of:
Click on a word to bring up parses, dictionary entries, and frequency statistics
1 ad Innocentium Pontificem Maximum
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.