argumenta singulorum librorum
Scribere quid deceat, primus liber explicat apte:Divitias summum esse bonum, negat ipse secundus,
Tertius ostendit quam sit fugienda voluptas
Te quartus natumque tuum Cytherea reponit:
5Qui sint foelices enarrat carmine quintus,
Pertractat sextus de morte ac nobilitate
De diis deque anima loquitur bene septimus ipse:
Indicat octauus, sit quanta potentia fati:
Daemonas atque hominum mores dat noscere nonus
10Scribitur in decimo, sapiens vir quomodo fiat:
Naturam undecimus totam, partesque requirit:
Vltimus in mundo archetypo, diuisque quiescit.
Nemo libellos legere qui volet nostros,
Se speret inuenire futiles nugas,
Quas otiosi diuites amant: rerum
Insanientes copia secundarum,
5Qui more puerorum iocosa sectantur,
Non hic gygantes, gorgonas, chimerasue
Non regna ditis fabulosa narrari
Sentiet: aliaque multa vatibus ficta,
Quae delicatis auribus placent valde,
10Neque hic superbos audiet pedum bombos:
Queis gaudet amens turba Paedagogorum,
Sed vera sequimur: vera dicere optamus,
Vtiliaque magis nostra continet charta:
Quam vana monstra: et irritas voluptates,
15Non igitur haec, collegiis ineptorum
Quorum omnis habitat mens in auribus, scripsi:
Sat est: libelli si bonis placent nostri.