Exultent iusti, letetur terra, resurgat
Impius et totus pulsetur laudibus ether!
Gratia quanta viget! Nunc gloria quanta paretur,
Quot iubilis, quot plena bonis, cum grata virescant
5Secula, quam letum sit et acceptabile tempus,
Musa refer! Clama, ne cesses! Singula terre
Climata, celorum fastigia, guttur abissi
Voce premas, istisque tuis orantibus imple.
Pande tuos, Paradise, sinus, extende priora
10Atria, dilates caulas, spaciosius auge
Pascua, quo tantas in te prompteque tuentes
Suspicias turmas; omnes quas ubere fetu
Iste vigil Pastor licito tibi fenore reddit.
Qui purgare soles animas crudelibus undis
15Alternando nives flammis, suspende rigorem
Hunc, donec saltem Iubileus transeat annus.
Nam venie penam functis, cedentibus orbe
Mutavere vias anime breviore volatu,
Nec tibi tam rigido penosa pedagia solvent.
20Tu, princeps baratri, tu quivis civis Averni,
Cum fluxu multo gaudens strepituque tuorum
Plange, tetrum magnis implens ululatibus antrum.
Utere quesitis animabus dente modesto,
Cerber, ne siccis ieiunans faucibus illis
25Glutitis usum perdas et posse vorandi.
Nam novus iste tue predo Bonifacius esce
Celestem ditare suis vult plebibus aulam.
O sine Marte volens eternam vincere mortem
Militiaque levi stipendia carpere vite
30Huc venias. Vos huc sitientes, oro, venite,
Hanc vite potetis aquam; nam cernimus ulcus
Et sanies anime tali torrente lavatur,
Non tantum vicine acies turbeque remote,
Sed vos, quos nostris equor divisit ab oris,
35Urbis tacturi postes date lintea ventis
Et silvis auferte trabes et stringite remos.
Ha, quicumque sciet sacri compendia cursus,
Istius et templi donum, quam crebra sacratis
Oscula liminibus figet cotienscumque reviset
40Ara, dona ferens et trite mentis odorem!
O quis cognoscet, quis tanta charismata digne
Pensabit, tibi quis, Bonifaci, solvere posset
Condignas grates et laudes, o pater orbis?
Papa, decus mundi, quo remige ridet Olimpus,
45Terra stupet, populi gaudent et Tartara lugent,
Vive, precor, quantum tu vis. Sed suspicor istud,
Ne interdum, molem rerum vel tedia vite
Horrens, dissolvi cupias. Plus ergo rogabo
Si dicam: vivas, quantum te mundus egebit.
50Mille trecentenos Christus cum volveret annos
Crimine mundatur toto qui quolibet orbe
Centeni geminos patronos visitat Urbis!
This text is part of:
Click on a word to bring up parses, dictionary entries, and frequency statistics
carmen iubilare (A. Frugoni, 1956).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.