1
Non ne magis referam Petrum, patriaeque parentem
Cosmum? Non Medicae pignora bina domus?
Temperet ut Lydos tanta Laurentius arte,
Stelligeros quanta Iuppiter ipse polos;
5Ut tandem, conata iugo subducere collum,
Protendit victas iam Volaterra manus;
Ut modo palladiae Pisis cedetis Athenae,
Ociaque antiquae dulcia Parthenopes.
Non ne magis referam ludicrae munera pugnae,
10Verinus quamvis dixerit ille meus?
Poene puer iuvenes valido Laurentius ictu
Deiecit, forti conspiciendus equo;
Paene puer terrae galeas devolvit inanes,
Stravit cornipedes arma virosque simul:
15Has ego non humili complectar carmine laudes,
Virtutis referens munera prima suae.
Paene puer fudit patriae Laurentius hostes,
Compulit et proprios deseruisse lares;
Armatos cives armis circumdatus ipse
20Duxit, et infidas expulit urbe manus:
Territus effugit patriis Detisalvus ab oris,
Nunc terit in longa tempora pauperie.
Haec mea Musa canet, nostro haec sint ore canenda,
Et meus hoc tantum pulvere sudet equus.
25His mihi descriptis, libeat quoque forsan ad illos
Flectere converso protinus axe rotas.
This text is part of:
Click on a word to bring up parses, dictionary entries, and frequency statistics
1 ad Laurentiam Medicem
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.