Poliziano, Angelo Montepulciano 1454 - Firenze 1494, odae, odae odae odae (I. Del Lungo, 1867)

¹
Puella delicatior
Lepuscolo et cunicolo,
Coaque tela mollior
Anserculique plumula;
5Puella qua lascivior
Nec vernus est passerculus,
Nec virginis blande sinu
Sciurus usque lusitans;
Puella longe dulcior
10Quam mel sit Hyblae aut saccarum.
Ceu lac coactum candida
Vel lilium vel prima nix;
Puella, cuius non comas
Lyaeus aequaret puer,
15Non pastor ille amphrysius
Amore mercenarius,
Comas decenter pendulas
Utroque frontis margine,
Nodis decenter aureis
20Nexas, decenter pinnulis
Ludentium Cupidinum
Subventilantibus vagas,
Quas mille crispant annuli,
Quas ros odorque myrrheus
25Commendat atque recreat;
Puella, cuius duplices
Sub fronte amica fulgurant
Amoris arcani faces,
Quas contueri non queo
30Nec stare contra vel procul,
Quin occuper flamma gravi,
Miser miser!, quae mollibus
Furtim medullis adsilit:
Non non ocellus, hospites,
35Ille est et ille, sed faces,
Faces Amoris igneae,
Quas laeta suscitat Venus,
Quas blanda pascit Gratia;
Quid narium dulcem modum,
40Vel quid genarum levium
Dicam nivem cum purpura
Fusam? Rosam cum lilio?
Labella quid coraliis
Rubore praenitentia,
45Tam saepe tam longum mihi
Mordente pressa basio?
Quid margaritas dentium
Praecandidorum proloquar?
Linguamque perplexabilem,
50Utcumque iuncto anhelitu,
Amanti amantem copulans
Festinat ad calcem Venus,
Cum suave olentem spiritum
Semiulca sugunt oscula,
55Lenocinante gaudio
Subinde murmurantia?
Mentumve quid tornatile,
Gulamque teretem et lacteam,
Et qua lacertis millies,
60Ut arbor hedera incingitur,
Incinta cervix est meis?
Nam quae tibi mamillulae
Stant floridae et protuberant
Sororiantes primulum,
65Ceu mala punica arduae,
Quas ore toto presseram
Manuque contrectaveram,
Quem non amore allexerint?
Cui non asilum immiserint?
70Quem non furore incederint?
O qui lacerti, quae manus!
Quos Iuno, quas Aurora habet;
O quale pectus et latus!
O venter, o crus, o femur!
75O qui Thetin decent pedes!
Pedes choreis nobiles,
Saltatibus mirabiles;
Statu, gradu spectabiles;
O verba iucundissima,
80Tam nequiter ludentia,
Arguta, plena aculeis
Decore suavitudine
Dicacitate gratia!
O carminum dulces notae!
85Quas ore pulchra melleo
Fundis lyraeque succinis,
Ut non Thalia blandius
Non ipse Apollo doctius
Feras canendo mulceant,
90Fluenta vertant in caput,
Et saxa cum sylvis trahant;
O cuncta salsa et dulcia,
Festiva laeta et mollia,
Referta amoenitatibus,
95Amoribus lubentia
Protervitate lusibus
Risu ioco leporibus!
O quicquid est pulchrum et decet
Puella sola continens;
100O praepotens cultu nimis,
Nimisque non culta placens;
Quis te deus mihi invidet?
Quae te mihi fors eripit?
Quo te repente proripis?
105Quo, quo fugis, bellissima,
Risu serenans aethera?
Heu mea voluptas, mel mecum,
Meum puella corculum,
Mihique longe charior
110Lapillis auro purpura;
Ac nec lapillis charior
Auroque solum et purpura,
Sed spiritu mi charior,
Sed charior mi sanguine.
115Memento tu tamen, precor,
Memento, formosissima,
Amoris atque compedum,
Quas a tenellis unguibus
Mecum tibi circumdedit,
120Heu lachrymis amantium heu
Suspiriis ridens, Venus.