[95]
nemo
Agrigenti neque aetate tam adfecta neque viribus tam infirmis1
fuit qui non illa nocte eo nuntio excitatus surrexerit,
telumque quod cuique fors offerebat arripuerit. itaque
brevi tempore ad fanum ex urbe tota concurritur. Horam
amplius iam in demoliendo signo permulti homines moliebantur;
illud interea nulla lababat ex parte, cum alii vectibus
subiectis conarentur commovere, alii deligatum omnibus
membris rapere ad se funibus. ac repente Agrigentini
concurrunt; fit magna lapidatio; dant sese in fugam istius
praeclari imperatoris nocturni milites. duo tamen sigilla
perparvula tollunt, ne omnino inanes ad istum praedonem
religionum revertantur. numquam tam male est Siculis
quin aliquid facete et commode dicant, velut in hac re
aiebant in labores Herculis non minus hunc immanissimum
verrem quam illum aprum Erymanthium referri
oportere.
This text is part of:
Click on a word to bring up parses, dictionary entries, and frequency statistics
1 infirmis Hp: infirmus RS
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.