Click on a word to bring up parses, dictionary entries, and frequency statistics
[38]
Ita enim senectus honesta est, si se ipsa
defendit, si ius suum retinet, si nemini emancipata
est, si usque ad ultimum spiritum dominatur in suos.
ut enim adulescentem in quo est senile aliquid, sic
senem in quo est aliquid adulescentis probo, quod
qui sequitur, corpore senex esse poterit, animo
numquam erit.
septimus mihi liber Originum est in manibus;
omnia antiquitatis monumenta colligo; causarum
illustrium, quascunque defendi, nunc cum maxime
conficio orationes; ius augurium pontificium civile
tracto; multum etiam Graecis litteris utor; Pythagoriorumque more, exercendae memoriae gratia,
quid quoque die dixerim audierim egerim commemoro
vesperi. hae sunt exercitationes ingeni, haec curricula mentis; in his desudans atque elaborans
corporis viris non magno opere desidero. adsum
amicis, venio in senatum frequens ultroque affero res
multum et diu cogitatas easque tueor animi, non
[p. 48]
corporis viribus. quas si exsequi nequirem, tamen
me lectulus meus oblectaret ea ipsa cogitantem,
quae iam agere non possem; sed ut possim facit
acta vita. Semper enim in his studiis laboribusque
viventi non intellegitur quando obrepat senectus:
ita sensim sine sensu aetas senescit nec subito frangitur, sed diuturnitate exstinguitur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.