Click on a word to bring up parses, dictionary entries, and frequency statistics
[51]
atque etiam mihi quidem videntur, qui utilitatis
causa fingunt amicitias, amabilissimum nodum
amicitiae tollere. non enim tam utilitas parta per
amicum quam amici amor ipse delectat, tumque
illud fit, quod ab amico est profectum, iucundum,
si cum studio est profectum. tantumque abest ut
amicitiae propter indigentiam colantur, ut ei, qui
opibus et copiis maximeque virtute, in qua plurimum
est praesidi, minime alterius indigeant, liberalis
simi sint et beneficentissimi. atque haud sciam an
ne opus sit quidem nihil umquam omnino deesse
amicis. ubi enim studia nostra viguissent, si numquam consilio, numquam opera nostra nec domi nec
militiae Scipio eguisset? non igitur utilitatem
amicitia, sed utilitas amicitiam secuta est.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.