This text is part of:
Click on a word to bring up parses, dictionary entries, and frequency statistics
5.
iam tum in Palatio monte Lupercal hoc fuisse
ludicrum ferunt et a Pallanteo, urbe Arcadica, Pallantium, dein Palatium montem appellatum.
[2]
ibi Euandrum,
qui ex eo genere Arcadum multis ante tempestatibus
tenuerit loca, sollemne adlatum ex Arcadia instituisse,
ut nudi iuvenes Lycaeum Pana venerantes per lusum
atque lasciviam currerent, quem Romani deinde vocaverunt Inuum.
[3]
huic deditis ludicro, cum sollemne
notum esset, insidiatos ob iram praedae amissae latrones, cum Romulus vi se defendisset, Remum cepisse,
captum regi Amulio tradidisse ultro accusantes.
[4]
crimini maxime dabant in Numitoris agros ab iis impetus fieri; inde eos collecta iuvenum manu hostilem in
modum praedas agere. sic Numitori ad supplicium
Remus deditur.
[5]
iam inde ab initio Faustulo spes fuerat regiam
stirpem apud se educari; nam et expositos iussu regis
infantes sciebat et tempus, quo ipse eos sustulisset,
ad id ipsum congruere; sed rem inmaturam nisi aut
per occasionem aut per necessitatem aperire noluerat.
[p. 9]
necessitas prior venit;
[6]
ita metu subactus Romulo rem
aperit. forte et Numitori, cum in custodia Remum
haberet audissetque geminos esse fratres, comparando
et aetatem eorum et ipsam minime servilem indolem
tetigerat animum memoria nepotum; sciscitandoque
eodem pervenit, ut haud procul esset, quin Remum
agnosceret.
[7]
ita undique regi dolus nectitur. Romulus
non cum globo iuvenum—nec enim erat ad vim
apertam par—, sed aliis alio itinere iussis certo tempore ad regiam venire pastoribus ad regem impetum
facit, et a domo Numitoris alia comparata manu adiuvat Remus. ita regem obtruncant.
Titi Livi ab urbe condita libri editionem priman curavit Guilelmus Weissenborn editio altera auam curavit Mauritius Mueller Pars I. Libri I-X. Editio Stereotypica. Titus Livius. W. Weissenborn. H. J. Müller. Leipzig. Teubner. 1898. 1.
The National Endowment for the Humanities provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.