This text is part of:
Click on a word to bring up parses, dictionary entries, and frequency statistics
ÞAT er upphaf þessarar sögu, at Logi hefir konungr
heitit. Hann réð fyrir því landi, er norðr er af
Noregi. Logi var stærri ok sterkari en nokkurr annarr
í því landi. Var lengt nafn hans, ok var kallaðr Hálogi.
Af honum tók landit nafn ok var kallat Hálogaland.
Logi var allra manna fríðastr. Brá honum um afl ok
vöxt í ætt sína, því at hann var risakyns. Hann átti
Glöð, dóttur Gríms ór Grímsgörðum norðan ór Jötunheimum,
er þá váru kallaðir fyrir norðan í Elivágum.
Grímr var inn mesti berserkr. Hann átti Alvöru, systur
Álfs ins gamla. Hann réð fyrir því ríki, er liggr í
milli á tveggja. Þær tóku nafn af honum, ok var kölluð
elfr hvártveggi. Var sú kölluð Gautelfr, er fyrir sunnan
var við land Gauta konungs ok skildi við Gautland.
En sú var kölluð Raumelfr, er fyrir norðan var ok
kennd var við Raum konung. Ríki þat var kallat
Raumaríki. Þat váru kallaðir Álfheimar, er Álfr konungr
réð fyrir, en þat fólk er allt álfakyns, er af honum
er komit. Váru þat fríðari menn en aðrar þjóðir næst
risafólki. Álfr konungr átti Bryngerði, dóttur Raums
konungs af Raumaríki. Hún var stór kona, en ekki
væn, því at Raumr konungr var ljótr. Er þat kallat,
at þeir menn sé miklir raumar, sem ljótir eru ok stórir.
Hálogi konungr átti tvær dætr við Glöð, drottningu
sinni. Hét önnur Eisa, en önnur Eimyrja. Þær váru
fríðari meyjar en nokkurar aðrar í því landi. Þær áttu
til þess kyn, svá var faðir þeira ok móðir. En sakir
þess, at eldr ok ljós birtir þar, sem áðr er myrkt, tóku
þessir hlutir nafn af fyrrgreindu fólki.
Jarlar tveir váru með Háloga. Hét annarr Vífill, en
annarr Véseti. Þeir váru báðir miklir menn ok sterkir.
Þeir vörðu land konungs. Þat var einn dag, at jarlarnir
gengu fyrir konung, ok bað Vífill Eimyrju, en Véseti
Eisu. Konungr synjaði þeim báðum. Þeir urðu við þat
mjök reiðir, svá at litlu síðar tóku þeir þær í burt ok
stukku ór landi ok firrðust fund hans, því at hann
gerði þá útlæga af ríki sínu, ok lét hann gera til þess
galdra, at þeir yrði þar aldri innlenzkir, ok lagði hann
á, at þeira ættmenn yrði jafnan útlægir af sínum eignum.
Véseti settist í ey þá eða hólm, er kallaðr er Borgundarhólmr.
Hann var faðir Búa ok Sigurðar kápu.
Vífill sigldi austr lengra ok settist í þá ey, er Vífilsey
heitir. Hann átti son við Eimyrju, konu sinni, er Víkingr
hét. Hann var snemma mikill vexti ok sterkari en
aðrir menn.