1.
Hae pinnae Sancti (quod fertur ubique) MariniTres libertatis saecula trina notant.
2.
Nominis eiusdem meliorem nacta maritumCurrina insolitos audio laeta choros.
3.
Sim plebs Curinae hinc poteris cognoscere quanti,Urbs sponsum quoties invidet alma mihi.
4.
Ut vivam aeternum, sponsus mihi vivat in annosNestoris; usque hortis praeferar Hesperidum.
5.
Clara viris doctis merito Macerata superbitEt Cruce qui pendet nec minus aere sacro.
6.
Ut sua Mondagani Bacchus vineta frequentat,Haec loca sic numquam respicit alma Ceres.
7.
Cur Clarignanum veteres dixere? Quod illudSola potest clarum reddere clara dies.
8.
Mons cum pistello mortaria parva tabelli-Onis, prospectum si videatur, erunt.
9.
Castellina suis vix se defendit ab undis;Cultore inde suo saepe relicta dolet.
10.
Patriciis fuerat Certaldum nobile quondam,Temporibus nostris est mera rusticitas.
11.
Rubra bonos generat prorsus seu Petra malignos,Nec medium retinet, sole repente caret.
12.
Ut vivat Sanctae Mariae miser incola MontisNescio, ni vivat rore, noto, lapide.
13.
Non mihi Cauletum posuerunt nomina caules,Sed pecori quod sim commoda caula meo.
14.
Arce, opibus lympha gaudet Ceregno perenni,Tristatur nebula, frigore, sole brevi.
15.
Mons Copiolus equos et pinguia rura bovesque;Causidicos multos Mons Copiolus habet.
16.
Commoda Monte Bovum duo sunt, frumenta pecusque;Fumus inest contra perpetuumque gelu.
17.
Effectus sequitur causam; ferturque SubannumSub Montis positum podice Carpinei.
18.
Indictum est nomen (si di voluere) SuannoQuod sua non habeat; quare aliena petit.
19.
Est Mons Grimanus pingui tellure beatus,Fontibus et quercu Crustumioque fero.
20.
Dant mala Tassorum Montes lapidesque virosque;Haec duo si demas, cetera perbona sunt.
21.
Nil aliud miseris superest, quibus alta teneturRipa, nisi hinc inopes frangere colla queant.
22.
Credula Fossa ruit magnae Carthaginis instarAusa datam Domino ter violare fidem.
23.
Qui cute, qui stomacho, qui rene et splene laborat,Vallem, ubi potatur plurima lympha, petat.
24.
Recte Ugolino Mons tunc dominante ferebar;Rectius, heu, vallis dicerer ima modo.
25.
Mons Maius flores tot numquam tempore vernoQuot promissa notos irrita ferre solet.
26.
Tausanum lacus est, ubi magnis piscibus ingensTurba minutorum semicomesa latet.
27.
Laetatur peperisse magis Petracuta PhilippumVatem, quam quod habet te, Libiane ferax.
28.
Quod foliis careat, hinc dicitur Afolianum;Quodque viris, dicas Avirianum etiam.
29.
Undique tutatur rupes praerupta LeonisMoenia, quae tantum scandit iniqua fames.
30.
Iam fuit hic gratus Domino felixque popellus;Abstulit, heu, miseris Tusculus omne decus.
31.
Maiolum melius dixissent nomine Aornon;Namque super volucris summa volare nequit.
32.
Cultores vitis meliores saecula numquamNostra tulere; parum gens tamen ista bibit.
33.
Tu quoque, Petra, nimis tuta ac secura manebis,Petra quod inde nihil diripiatur habet.
34.
Antiquum antiquum Francisci gratia redditGrata mei et Pario marmore Virgo nitens.
35.
Artis Pinna viros medicae iurisque peritosProcreat, indignam sustinet usque famem.
36.
Scaulinum sine caule lacu iam nobile pleno,Quanta inerat, sicco, nobilitate caret.
37.
Illustras Billos; tua nam, sanctissime Iannes,Candida Vestali est plena sorore domus.
38.
Non macies, sed magna acies hic fusa phalangumFlorentinorum nomina vera facit.
39.
Carpineus dat aquas, dat saxa, dat aera purum,Dat caseum, dat equos, dat cereale bonum.
40.
Nata pascendo pecori Mons splendidus herbaCarpineus comites dat mihi, nomen, opes.
41.
Irrigui fontes et lati pascua campiEt Castellaciam ditat aratus ager.
42.
Frontino tanto decori Vandinia gens estQuanto, Roma, fuit gens Fabiana tibi.
43.
Et Velianum quae vertice sidera tangitTurris et ornatus nobile reddit ager.
44.
Vade Monasterium, si vis reperire molestum,Mendicum, insanum, vile hominumque genus.
45.
Cur, San Siste, tuas dotes post terga relinquam?Sed loca sancta prope est maxima quod tibi sunt.
46.
Petra et Caula tibi, nec nomina vana dedere;Plurima enim petra est, plurima caula fuit.
47.
Fabrili dat Serra viros lippa arte valentes;Unum hoc si demas, dempseris omne bonum.
48.
Inde Lupaiolum veteres dixere, quod illicSive lupus fuerit, seu lupa multa bipes.
49.
Paupere Planani oppidulo domus unica ventremExtendit, pallet cetera turba fame.
50.
Lunanum quarta fundatum credere lunaDesine; namque venit plurimus inde pepo.
51.
Saltantes tremulo Corvorum clune puellasEt solidis etiam Saxa diebus alunt.
52.
Disiectam Tabuletum arcem iam desine flere;Tanti causa mali namque Vitellus obit.
53.
Omnis homo - mirum! - muratae est incola Villae,Quod merito possis dicere Lauditurum.
54.
Triticeas moles quamvis det Sanctus Ioannes,Sunt monachi eiusdem femina virque tamen.
55.
Nec procul hinc tibi Ripa venit Massana, sed illamTerra ferax, non gens provida laetificat.
56.
Hanc Vallem Coryli ne spernas; altera namqueRoma colit Papam et videt usque suum.
57.
Ripetrosa, tibi cum sint saxa alta, timore(Quam bene tecum actum est!) invidiaque cares.
58.
Sancta suis crucibus premitur Crux aspera: raraArbore glandifera pomiferaque nitet.
59.
Irriguis hortis Valtevae est clara, MinervaeMuneribus, lympha, quae levis ore calet.
60.
Notum quod saxis Saxum specularibus aut quodIncola corda habeat saxea nomen habet.
61.
Anguilla, Cerere et porco qui surgis amoenus,Labe tamen multa, Mons Liciane, cadis.
62.
Giambona sola domus repararet diruta GipsiMoenia, ni contra scandala multa forent.
