Si tacitus tua regna secem, damnarer ab omni,
Complerim numeris cum loca multa meis.
Si loquar, in laudes quid tanti principis edam,
Quem totiens Musae concivere novem?
5Moliar ut videar corvus velut inter olores,
Sive cadam magno pondere pressus humi.
Nec numeris opus exiguis: namque undique vates
Te canit herois ille vel ille tubis.
Nomen ad occasum iam iam Titanis ab ortu
10Evolat et tepidos frigidulosve Lares.
Scipiadam ut priscos fertur celebrasse Quirites,
Sic tua longa canet nomina posteritas.
Tu decus atque evi specimen praesentis honosque
Unica et Ausoniae gloria militiae:
15In te clara manus Mavortia cuncta recumbit
Appellatque suum bellica turma patrem.
Tu veteres forti superasti et pectore fastus,
Et vetus ingenti tu decus ingenio.
Si cuius bene gesta velim memorare loquendo
20Sidus ab Hesperia finiet ante diem;
Conticuisse tamen melius quam pauca referre,
Dicere multa etiam cum brevis hora vetet;
Grataque si quando reddent mihi fata deusque
Otia, maiores aggrediemur opes.
25Nunc satis esto meum, princeps Federice, dicare
Ingenium titulis tempus in omne tuis.
This text is part of:
Click on a word to bring up parses, dictionary entries, and frequency statistics
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.