Silva Placentinas inter densissima valles
Tangit arenosi littora curva Padi;
Forte viret iuxta florenti gramine pratum,
Mille petunt illic pabula grata boves,
5Hirsutaeque solent illic errare capellae,
Nec non lanigerae quaerere gramen oves;
Silvestres tenui canna culmoque palustri
Pastores humilem composuere casam.
Hic ego de multis emisso lacte iuvencis
10Caseus in densum comprimor arte globum;
Inde ubi sum manibus latum calcatus in orbem,
Perstringit tenerum lignea zona latus;
Et ne confodiant furtim mea pectora vermes,
Me tegit aequoreo rustica turba sale;
15Neve nimis capiam lignosum molis odorem,
Sedula me volvit atque revolvit anus;
Nec dum nostra duos aetas compleverat annos,
Aequavit currus cum mea forma rotas.
Me vix impositum tergo portasset asellus,
20Pulsasset forsan pondere pressus humum!
Tandem me cupidus venalem pastor in urbem
Detulit, in medio constituitque foro;
In me convertunt oculos iuvenesque senesque
Et me certatim garrula turba petit:
25Pinguis erat croceoque cutis spectanda colore,
Implebam totum lactis odore forum.
Me videt interea spectatque Azanelus et optat.
Argentique dato pondere solus emit;
Inque lares tergo sublatum mittit equino
30Laetus et in thalamo collocat ille suo;
Saevaque ne rapidi faciant mihi vulnera mures,
Alligat ad summam fune tenente trabem;
Neve nimis durus constringeret ilia cortex
Ungebat liquido terque quarterque oleo.
35Ah quotiens fixis dum me conspectat ocellis,
O magno, dixit, munera digna duce!
Heu heu, me miserum crudelia fata manebant,
Nec potuit vitae consuluisse meae.
Nam dum forte abiit foribus male cautus apertis,
40Irruit in vacuos impia turba lares,
Succisoque trahit pendentem saeva rudente,
Nec pudet ex alta praecipitare trabe;
Vixque ruens duram concusso corpore terram
Contigeram, ferro cum mea membra petit,
45Exanimesque artus in plurima frusta secantur,
Sicque superiecta transferor inde toga.
Non mea marmoreo componunt membra sepulchro
Concava nec cineres contegit urna meos;
Alter sed calidas tritim me mittit in offas,
50Ingerit et pingues alter in arterias;
Alter et ardenti liquefactum decoquit igne,
Et tenuis tosti crustula panis habet.
Pastillus sine me digitis productus aduncis
Nec tereti baculo lagana tensa placent.
55Quid referam quod nunc rabido me dente lacessant,
Mille modis miserum turba gulosa vorat?
Plange meos casus iamque iamque, Azanele, caveto
Incustoditas deseruisse Lares!
This text is part of:
Click on a word to bring up parses, dictionary entries, and frequency statistics
elegia de caseo (A. Cinquini, 1910).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.