1
Iam cornu gravidus praecipitem parat
Afflatus subitis frigoribus fugam
Autumnus pater, et deciduas sinu
Frondes excipit arborum.
Cantant emeritis, Bacche, laboribus
5Te nunc agricolae, sed male sobrios
Ventosae querulo murmure tibiae
Saltatu subigunt frui.
Nos anni rediens orbita sub iugum
Musarum revocat, dulce ferentibus;
Porrectisque monent sidera noctibus
Carpamus volucrem diem.
10I mecum, docilis turba, biverticis
Parnassi rapidis per iuga passibus,
Expers quo senii nos vocat et rogi
Consors gloria coelitum.
Nam me seu comitem seu, iuvenes, ducem
Malitis, venio: nec labor auferet
15Quaerentem tetricae difficili gradu
Virtutis penetralia.
This text is part of:
Click on a word to bring up parses, dictionary entries, and frequency statistics
1 ad Iuventutem in principio studii
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.