Guido, Sophoclaeis semper resonande cothurnis,
Digne Sibyllinos vivere Guido dies!
Vernantes patula quot aves sub fronde teguntur,
Quot pascit Calabras fertile gramen oves,
5Praesenti meritas solvo tot carmine grates,
Ne fluat officii munus inane pii.
Ante vagans solitos mutabit Cynthia cursus,
Quam cadat ex animo gratia facta meo.
Volvetur nono dum mundus ab orbe rotatus,
10Obsequium pandam tempus in omne tuum.
Acceptum grato vulgandum est munus ab ore:
Ipse suum iactans sordidat auctor opus.
Ecce facis solers nostrorum exactor honorum,
Regius ut solito more poeta ferar.
15Et ferar et passo dentur sua dona labori,
Aptaque condendis ocia rebus agam.
Optimus est quisquis sola virtute paratur:
Talis inexhaustam praestat amicus opem.
Ut fera pro capto qui vincla subivit amico
20Non leve perfecti nomen amantis habet.
Propterea pigrae fugienda ignavia vitae,
Et labor est summa continuandus ope.
Augetur multo virtus operosa labore
Villescitque gravi segnis inersque situ;
25Rodentique piger rubigine sensus hebescit
Et sopita nocens pectora torpor habet.
Mollia frigescit neglecta per ocia virtus,
Ocia per centum luxuriata modos.
Excitat ignavos semper labor improbus artus,
30Ut male veloces utile calcar equos.
Qui rudis et nullas expers cognoverit artes
Iugera prevalido dura ligone terat.
Sit licet incultum, tamen est laudabile quicquid
Tota per assiduum membra fatiget opus.
35Qui gnavum posito sese exercere veterno
Affectet promptum semper habebit opus.
Audenti immensum nautae non deficit aequor,
Militibus cupidis bella gerenda patent,
Lataque non desunt poscentibus arva colonis,
40Et compos voti quisque placentis erit.
Parvula sed magnum subiens formica laborem
Exempla humana gente sequenda dedit.
Nam cum percussa detrita est area fruge,
Indiga terrenas deserit illa domos.
45Excussi ad plenos frumenti tendit acervos,
Et cava vitalem portat in antra cibum.
Pars pede, pars humero, praedam pars devehit ore
Venturaeque hyemi provida turba cavet.
Neve novum humenti germen tellure remittat,
50Conditur abroso semine vecta seges.
Si clausum hybernus granum madefecerit imber,
Siccat in aprico sole tepente loco.
Et priscum repetens tectum indefessa reponit:
Impigra sic gelidas praeterit illa nives.
55Dedaleas et apes, cum prima incoeperit aestas,
Non minor exercet sole micante labor.
Ad matutinum reboans vocat una laborem:
Exit ad officium sedula quaeque suum.
Ad nova seu referunt lectos praesepia flores,
60Seu stipant dulci condita mella favo,
Vel facto interrimunt infensos agmine fucos,
Vel si qua est lato pondere fessa levant,
Aut visa excutiunt rerum excrementa recentum
Mundicies pulchri tanta laboris adest.
65Custodes portis aliae bipatentibus astant,
Ne qua laboratas vis populetur opes.
Regia plebaeis divisa palatia tectis
Mens struit ad miros ingeniosa modos,
Et cessans turpi punitur inertia morte.
70I nunc et torpens tempus abire sinas;
Adde quod excubitor peragenda negotia gallus
Significat cantu nocte silente suo,
Et vigiles certis cantus determinat horis
Tendit et ad somnum sole cadente brevem,
75Ne stertat tota post multos nocte labores
Et sua distinguens tempora sudet homo.
Hinc venit Alcides cunctis imitandus ephebis,
Cui grata est spretis cura laborque iocis,
Utque peragratum monstris paccaverat orbem,
80Coelestes petiit quos tulit ante polos.
Dulcibus illecebris quotiens oblata voluptas
Allicit, est fortis continuisse viri!
Stat virtus duros inter versata labores,
Difficilique aditu sudor anhelus inest.
85Ardua sunt nunquam magno sine facta labore,
Nec venit ex molli vivida fama thoro.
Ast ubi sunt rigidi superata cacumina montis
Nomen inextinctum maeta suprema gerit.
Illic certa quies, illic iocunda voluptas:
90Praeteritus sudor dulce iuvamen habet,
Littera ceu monstrat Samyo divisa poetae
Ex Palamedaea littera facta grue.
Unde brevem eterno vitam cum nomine mavult
Quam longo Aeacides tempore vivat iners.
95Me iuvat et prima multum vigilasse iuventa,
Ut mea sit tantum nacta Camoena virum;
Nacta Camoena virum, tuta est quo sospite virtus:
Non parva est summis fama placere viris.
This text is part of:
Click on a word to bring up parses, dictionary entries, and frequency statistics
ad Guidonem Rupefortem (G. Tournoy-Thoen, 1982).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.