1
Est curae superis regni moderator Hiberi,
Iustitia insignis pariter Ferrandus et armis.
Grata deo est pietas raroque obnoxia fraudi
Exanimata nefas timuerunt saecula diri
5Daemonis, instanti eripuit divina periclo
Servavitque pium merito clementia regem.
Exarsit livore satan fremuitque superbo
Ore ferox sua sacra rapi sordesque nefandi
Maumetti extergi purgatis Baetidos oris;
10Accepit sanctum Christi Granata nitorem,
Quin immunda lues regnis excessit Hiberis
Atque omnis sentina mali, Iudaeus abactus
Exulat, his solum cultus divinus in oris
Integer excolitur; tumuit Cocythius hostis
15Egregii virtute ducis sua regna perempta
Et Libyen similem iam iam spectare ruinam,
Concilium horrendum Stygia furibundus in aula
Convocat, exponit, quantum conatibus obstet
Tartareis pulso, Saraceno Hispania victrix;
20Tollere iuravit Ferrandus et aurea coniunx,
Quicquid Avernales scelerum sparsere furores,
Signifer ut Stygiae Maumettus corruat alae,
In Tartessiaco regno nil iuris habemus;
Ecce salutiferi celebrant solemnia Christi
25Occiduae gentes, at nos cessamus inertes,
Ignavum telis vulgus terebramus acutis.
Haec est insignis nostri victoria Martis
In sanctos reges; torpent ad vulnera dextrae,
Ceu desint vires et fraudum effeta voluntas
30Perdendi mortale genus consumpserit artes.
Cunctamur resides, ai non contatur Hiberus,
Martia nec coniunx cessat noctesque diesque
Prostrato Mauro crucifixi extendere legem.
Africa. quae paret nostris imbuta venenis,
35Omnia sollicito prospectat carbasa visu,
Hispano quisquis classem de litore solvit:
Hanc quoque perdemus, nisi nostris corruat armis
Rex prius, hoc nobis stabit victoria caeso.
Dixerat. Hoc torvo Stygii simul ore fremebant
40Daemones atque unus violenta percitus ira
Iurat in exitium regis spatiumque modumque
Deligit, illapsus praecordia repit agrestis
Insanique hominis, vexat miserabile pectus
Horrenda et variis turbant insomnia formis,
45Arragonum ut perimat regem famaeque perennis:
Sic decus instabit vel parti gloria regni.
His actus furiis collum venerabile regis
Parricida ferox nequiquam vulnerat ense.
Nil agis, infelix daemon, custodia solers
50Excubat angelica et vigiles pro principe turmae
Amovere nefas. Superabit Nestoris annos
Ferrandus victorque una cum coniuge nomen
Scindet Avernalis Maumetti, diruet aras
Sacrilegi ritus, gladium nec differet ultra
55Stringere fulmineum Christo duce et auspice Christo,
Victricis vexilla crucis deducet in hostem,
Dire satan, tentes licei artes mille nocendi,
Non prohibere tamen poteris regemque morari,
Quin arma expediat, trans Calpen classe parata
60Ocius aestiferas ferro populabitur urbes.
Ut crescente fide divum simulacra ruerunt
Sculptilium et caecus stultorum apparuit error,
Sic obscena ruent Saracenae opprobria sectae,
Clarum euangelii iubar exorietur ubique.
65Christicolae interea tanto pro munere grates
Innumeras animo mundo referamus ovantes,
Solvamus pia vota deo; nil rege timendum est
Tam claro incolumi, cuius tremit Africa nomen
Formidantque urbes Syriae, ne Martia victor
70Agmina Ferrandus Solimorum ducat in arcem.
This text is part of:
Click on a word to bring up parses, dictionary entries, and frequency statistics
1 gratulatio christianorum de incolumitate Ferdinandi | regis Hispaniarum ab insultu fanatici parricidae
gratulatio de incolumitate Ferdinandi regis (I. Fógel, 1933).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.