This text is part of:
View text chunked by:
Click on a word to bring up parses, dictionary entries, and frequency statistics
Pinguis ager canitur presso sulcatus aratro,
Uber et aprico vinea culta iugo.
Forte senex Corydon simul et crinitus Amyntas
Sederunt viridi fluvialis margine ripae.
Illi solus ager, sola est huic vinea curae.
Quisque suas extollit opes, sub iudice nullo
5Haud discors certamen habent. Prior inquit Amyntas.
1 O nimium felix possessum quisquis agellum
Desidis exercet pulso torpore veterni.
Non mala paupertas, non ora famelica cogunt
Improba concussa pelli ieiunia quercu.
10Obsequitur bene cultus ager maioraque reddit
Faenora quam capiat, messique capacia desunt
Horrea; tam larga est undanti Copia cornu,
Annua sic nostro respondet glaeba labori.
Cum nimis ignavos intra sua tecta colonos
15Aspera claudit hiems, agrestia cudimus arma
Sollertique manu soles superamus inertes.
Vere novo pinguem depresso vomere terram
Curvus aro, fortesque gemunt sub pondere tauri,
Atque iterum obliquo proscissum est aequor aratro,
20Et crassas rigido glaebas disrumpo ligone.
Haec eadem autumno tellus versatur aperto
E gremioque habilis deprensum dextera semen
Proicit, et pariter sulcis abscondit aratis
Ardua quos cingunt altae munimina fossae.
25Et Cereri sua sacra fero, ne grandis acervus
Desit et optati spes irrita decidat anni.
At cum luxurians tenera seges advenit herba,
Pascimus, ut rarus gravidae sit culmus aristae
Et melius rectum vacuas se extollat in auras.
30Nec minus infelix lolium lappasque nocentes
Et crebro sterilem rastro insectamur avenam.
Aestibus in mediis ne flaccida decidat herba,
Exustum induco sinuosum flumen in agrum;
Et bibulis limum sulcis diduco palustrem.
35Si qua nocet frondosa satis crescentibus umbra,
Curva falce premo; volucres expello rapaces
Ingenti sonitu fictae vel imagine formae.
Quid, cum matura flavescit campus arista?
Si nostra herbosis obducta est area clivis,
40Vertimus, et molli solidata foramina creta
Aequamus tereti saxo plantaque sequenti.
Post seco triticeam segetem, sparsosque maniplos
Ictibus immensis ferio; percussa refertis
Grana fluunt spicis, paleae cumulantur inanes;
45Et discussa levem iacio frumenta per auram,
Et mundata loco. Nullis granaria rimis
Rodentem admittunt murem, cribroque frequenti
Excutio infestas spisso cum pulvere blattas.
Urimus et secta stipulas gravitate carentes.
50Nec semper frumenta sero; vel pingue legumen
Accipit, aut totum durescit campus in annum,
Et sparso exhaustas reparat laetamine vires.
2 Graniferum non damno solum camposque feraces
Qui fuerint cupido iussi servire colono;
55Non tamen inferior nec dispar vinea; fructu
Uberiore manet; docet experientia saecli
Longa mei; multis exercitus usus ab annis
Doctior est primae molli lanugine barbae.
Vinea sed pigro nil profectura colono;
60Exigit ingentem curam durosque labores.
Seu deformis hiems, seu torrida fugerit aestas,
Ipse sero parili distantes ordine vites
Collibus apricis croceam qua conficit uvam
Exoriens Phoebus; sed glaebas ante supinas
65Conterit aspirans Aquilo versique bidentes.
Iungimus et rasas contra mala flamina cannas,
Illarum infectus ne qua robigine cortex
Crescentem abrodat vitem. Dum bracchia palmes
Prima tener fundit, manibus decerpo repandis,
70Sed validum ferro tabulatum scinditur unco,
Ut melius penetrans gravidam sol decoquat uvam.
Atque infesta vetant textae pecuaria saepes.
Ne calor intensus, nimium ne frigus adurat,
Saepius est ducta vitis circumdata terra.
75Et sulco defixa levi propago remittit
Aemula maternis melioraque germina ramis.
Fervida cum summis vindemia collibus instat,
Carpimus ex plenis maturas vitibus uvas,
Fortibus et calathos umeris portamus onustos.
80Dumque lacu positas celeri pede rumpimus uvas,
Sordida tinguntur salienti corpora musto.
Desuper expressos torquentia saxa racemos
Ponimus, astrictis munitaque dolia circlis
Implentur, raucumque cient nova musta susurrum.
85Inde coronatum patri cratera Lyaeo
Libamus cuncti magno clamore vocantes.
Ut vitem sera spoliatam fronde putavi
Atque fimo sparsi crebro sola fracta bidente,
Sub tectum sarmenta fero, flammaeque salubres
90Lucentesque micant, madidus cum defluit umor.
Hi duo pastores placida sic voce canebant
Tityrus Ascraea lusit quae primus avena.
Quisque suam exhausto villam sermone petivit.
bucolica (W. P. Mustard, 1918).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.