Minervi, Severo Spoleto fere 1470 - 1529, carmen elegum, carmen elegum eleg. carmen elegum ad magnificum Laurentium Medicem ad Leonem Pont. Max. accedentem (F. Bausi, 1985-86)

¹
Ibis ad ora sacri comitatus, Laure, Leonis
Ominibus faustis, numinibusque Deum.
Ibis, et insignes repetens virtute parentes,
Ostendes, quantus sit tibi in ore decor.
5Carminibus te nos, animisque sequemur euntem,
Spesque, Fidesque tuum nostra sequetur opus.
Te Fortuna comes dextro pede laeta sequetur,
Ipsa dabit vires, ipsa docebit iter.
Hac duce possedit Nephelaei vellera Phryxi
10Aesonides: domuit monstra, fretumque tumens.
Hac duce Pellaeus iuvenis per Bactra, per Indos,
Per Scythiam, et Phasim signa, virosque tulit.
Hac duce Romano Caesar tot barbara tela,
Tot regna, et populos subdidit imperio.
15Hac duce Carpathia pauper mercator in unda
Fit dives: pelagi non timet ipsa minas;
Hac duce purpureos humili de gente Tyrannos
Cernimus; haec homines sola, deosque regit.
Haec tibi divitias, haec regna, haec sceptra paravit,
20Haec quo te ducet, dirige, Laure, pedem.
Tu Latias tendes, Veneris ceu natus, ad oras
Hac duce, cum fatis, auspicioque Iovis.
Altera continget tibi nunc Lavinia coniux;
Principis Ausoniae quaeque futura parens.
25Iam taedas, Hymenaee, paras; iam sacra beatae
E coelo laetus virginis ora vides.
Felix Laurus eris; longe at felicior illa,
Continget niveo quae tibi, Laure, sinu;
Felix, quae sancto se se tibi iunget amore,
30Et quae te faciet nupta puella virum.
Non frondens hedera sic stringitur aesculus: illi
Sicut te dulci stringet amore fides.
Nam dotata tibi veniet virtutis honore,
Viribus, ingenio, nobilitate et ope.
35Sanguine Scipiadum non se Cornelia iactet,
Non Lybicis opibus, nam tua maior erit.
Aurea non rutilis iactet se Aurora quadrigis;
Tigribus, aut sertis non Ariadna suis.
Non se munditiis Hebe, Hermioneque nitore,
40Aemonio non se Laodamia viro.
Non se Penelope servati iure pudoris,
Non sacra Evadne laude pudicitiae.
Non se Tyndarides formae praeponat honore;
Ante omnes omni dote ferenda tua est.
45Hoc tua me virtus, hoc spes mea dicere cogit,
Auspicium thalamis, hoc meus optat amor;
Addent cui Superi quam plurima: sic mea vota,
Sic merita, et mores promeruere tui.
Sic Patruus de te statuit tuus: ille ministrat
50Ecclesiae, et fidei numen, et orbis opes.
Ille regit Medica populos pietate, tuetur
Iustitia pacem, viribus Imperium.
Et quia magnanimis domuit virtutibus hostes,
Ex meritis nomen, vimque Leonis habet.
55Ad quem tende citus; namque annuit, ire iuvabit,
Dum te avidus votis optat adesse suis.
Quid, nisi plaudentes reditus sperare secundos
Possumus? ipsa parat Sorsque, Venusque viam.
Magnificum, et faustum gaudens te Roma videbit;
60Maiorem nobis reddet et haec titulis.
Auxit ut Assaraci deductam ab origine gentem;
Sic te, sic Medicum tollet in astra genus.
I felix, felix redeas, teque aura sequatur,
Atque tuum Zephyrus perdominetur iter.
65Sint sine nube dies, taceant et corus, et auster,
Ipse mei ut possit ire, redire memor.