Virgo decus coeli, virgo sanctissima, Virgo
Quae super angelicos es veneranda choros,
Tu niveas formosa rosas, tu candida vincis
Lilia, tu vultu vincis et astra tuo,
5Pura columbellae similis; quam lactea vestit
Penna, nec in toto corpore menda sedet.
Quas tu non longe praecellis virgo sybillas?
Quae tibi conferre denique nimpha potest?
Tu mater dilecta Dei, tu sponsa vocaris,
10Praecipua tantum virginitate places,
Quae licet aedideris dictu mirabile Christum.
Attamen ut fueras, intemerata manes,
Per te nostra caro, meritis ita foemina fulges:
Est immortali conciliata Deo.
15Tu sacrum templum, tu fons uberrimus ille es,
Cuius inexhaustam detrahit unda sitim.
Imus ad aethereas te nos interprete sedes.
In coelum per te virgo patescit iter.
Auxilio, Regina, tuo non ullius arma,
20Nullius horremus, te vigilante, minas,
Tu clipeus, tu thorax, et tu mortalibus unum
Praesidium miseris, perfugiumque pates,
Cum malus assidue mortales raptor oberret
Esuriens pavidas, ut lupus ambit oves,
25Tu facis insidias eius vincamus, et artes
Tu rapido tutos a Flegethonte facis,
Tu precibus supplex nunquam cessantibus oras,
Ut nati fiat mollior ira tui;
Ni facias adeo, passim cravere nocentes,
30Funditus humanum deleat ille genus,
Tu pia sperantes in te non deseris unquam,
Tu vacuas clemens non sinis esse preces,
Tu das optatam languenti saepe salutem,
Eripis e duro carcere saepe reum.
35Te vocat in partu mulier, te miles eamdem
Subvenias quaerulo saucius ore rogat,
Saepe procelloso iactatis aequore nautis
Dirigis in portum stella serena ratem,
Erigis afflictos, aegris solatia praebes.
40Saepe venis terra, saepe vocata mari,
Tu morbos diramque famem bellumque coerces
Exigis a terris pestis et omne genus,
Hinc votiva tuis ponuntur munera templis
Quae sita sunt virgo milia multa tibi:
45Nemo per haec tutus, sine te deserta viator;
Nemo per hoc pelagus te sine: sospes erit.
Et quoniam claudis portas: et pandis Olympi
Et quia tu talis: et quia tanta potes.
Fer precor auxilium virgo sanctissima nobis:
50Et servatricem porrige quaeso manum.
Illisa est scopulis fundoque impacta carina:
Nec sine te navis currere nostra potest:
Nam nisi pro solita tu nos pietate misellos
Foveris: ad cuius confugemus opem?
55Edidit hoc carmen donum tibi virgo Tifernas
Cum Pius in Petri sede, secundus erat.
This text is part of:
Click on a word to bring up parses, dictionary entries, and frequency statistics
in beatam Mariam Virginem (V. Corbucci, 1935).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.