1
Hunc quem videtis ire fastoso gradu
Servis tumentem publicis,
Vel hinniente per forum vehi capax
Equo, quod omnes despuant;
5Turbam superbo praeterit fastidio
Qui civium stomachantium,
Gravique cunctos ora torquentes retro
Despectat insolentia;
Intraque tutum moenibus pomerium
10Agros patentes possidet;
Villamque dives publico peculio
Insanus urbanam struit,
Ubi ocietur inter obscoenas lupas
(Ne turpiora dixerim),
15Ubi ampla pergraecetur inter pocula,
Senex podagra rancidus;
Hunc vos putatis stirpe forsan inclyta,
Virtutis aut insignibus
Ad hoc volasse protinus fastigium?
20Falsum putatis, hospites.
Molas hic inter natus est aquaticas,
Gratus sodalis muribus:
Fortuna ludens furfuris plenum tulit
Ad usque supremos gradus,
25Monstrare gaudens arroget quantum sibi
Mortalis impudentia
Ergo iste tantis arduus suffragiis
Nunc immemor natalium,
Ut quemque longo stemmate clarum videt
30Aut dote rara nobilem,
Tristi veneno spargit et rodit statim
Rubiginosis dentibus.
Non ipse se, fortuna non ipsum capit
Aura favoris ebrium:
35Sic culmen altum lubrico premens pede,
Ventisque turbidis patens,
Casurus usque nutat et iam iam cadet,
Sed non gradatim scilicet.
This text is part of:
Click on a word to bring up parses, dictionary entries, and frequency statistics
1 in Bartholomaeum Scalam
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.