1
Omnia non semper possunt cognoscere vates,
Semper et humanum non viget ingenium;
Ut semper tenerae non lucent cornua lunae,
Nec Phoebus semper mergit in amne rotas;
5Spicea sic aestas toto non volvitur anno,
Nec durant pratis arboribusque comae;
Semper et herculei non torrent terga leonis,
Cyntihus aurata nec sonat usque lyra.
Quis me compulerit pueriles scribere versus
10Ignotum est, video, culte poeta, tibi.
Credis ut aonio tecum concurrere gyro
Ipse velim et vatem vincere carminibus?
Accipe quid contra dicam tibi, docte Ioannes,
Curque seni ignarus scribere non timui.
15Iam sol Tyndaridas geminos lustrare quadrigis
Coeperat, et tepidum iam promovere diem;
Cum somnus dulci solvit mea membra sopore,
Curarum domitrix pressit et alta quies.
Ecce ego conspicio venientes ordine Musas...
20Aut fuit, aut vacuae somnia mentis erant.
Quaeque suos vario velarat flore capillos,
Cuiusque in manibus laurea virga fuit.
Ut primum thalami tetigerunt limina nostri,
Lucida ab aethereo est lumine facta domus.
25Hic Dea, pieridas inter pulcherrima cunctas,
Incoepit roseo sic prior ore loqui:
Surge, age, phoebaeos qui vis cognoscere vates,
Ut tua gorgoneis ora rigentur aquis.
I, Geminiani celeri pete moenia passu,
30Moenia quae multum Cynthius ipse colit:
Hic vates viridi redimitus tempora lauro
Ad Phoebum poterit praevius esse tibi.
Dixit. Et ex oculis cunctae fugere sorores,
Et mea destituit lumina somnus iners.
35Scis nunc cur numeros misi tibi, docte poeta?
Ut tangam sacri, te duce, fontis aquas.
This text is part of:
Click on a word to bring up parses, dictionary entries, and frequency statistics
1 ad Ioannem Baptistum Cantalicium
elegiae (I. Del Lungo, 1867).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.