XLIV
Quinte Caledonios Ovidi visure Britannos
Et viridem Tethyn Oceanumque patrem,
Ergo Numae colles et Nomentana relinquis
Otia, nec retinet rusque focusque senem?
5Gaudia tu differs, at non et stamina differt
Atropos, atque omnis scribitur hora tibi.
Praestiteris caro—quis non hoc laudet?—amico,
Ut potior vita sit tibi sancta fides;
Sed reddare tuis tandem mansure Sabinis
10Teque tuas numeres inter amicitias.