LXXX
Non totam mihi, si vacabis, horam,
Dones et licet inputes, Severe,
Dum nostras legis exigisque nugas.
'Durum est perdere ferias': rogamus,
5Iacturam patiaris hanc ferasque.
Quod si legeris ista cum diserto
—Sed numquid sumus inprobi?—Secundo,
Plus multo tibi debiturus hic est,
Quam debet domino suo, libellus.
10Nam securus erit, nec inquieta
Lassi marmora Sisyphi videbit,
Quem censoria cum meo Severo
Docti lima momorderit Secundi.