XLVI
Florida per varios ut pingitur Hybla colores,
Cum breve Sicaniae ver populantur apes,
Sic tua subpositis conlucent prela lacernis,
Sic micat innumeris arcula synthesibus,
5Atque unam vestire tribum tua candida possunt,
Apula non uno quae grege terra tulit.
Tu spectas hiemem succincti lentus amici
—Pro scelus!—et lateris frigora trita times.
Quantum erat, infelix, pannis fraudare duobus—
10Quid metuis?—non te, Naevole, sed tineas?