LXXV
Non silice duro structilive caemento,
Nec latere cocto, quo Samiramis longam
Babylona cinxit, Tucca balneum fecit:
Sed strage nemorum pineaque conpage,
5Ut navigare Tucca balneo possit.
Idem beatas lautus extruit thermas
De marmore omni, quod Carystos invenit,
Quod Phrygia Synnas, Afra quod Nomas misit,
Et quod virenti fonte lavit Eurotas.
10Sed ligna desunt: subice balneum thermis.