6.
[14]
qua re si propter socios nulla ipsi iniuria lacessiti maiores
nostri cum Antiocho, cum Philippo, cum Aetolis, cum
Poenis bella gesserunt, quanto vos studiosius1 convenit
iniuriis provocatos sociorum salutem una cum imperi vestri
dignitate defendere, praesertim cum de maximis vestris
vectigalibus agatur? nam ceterarum provinciarum vectigalia,
Quirites, tanta sunt ut eis ad ipsas provincias tuendas2
vix contenti esse possimus, Asia vero tam3 opima est ac
fertilis ut et ubertate agrorum et varietate fructuum et
magnitudine pastionis et multitudine earum rerum quae
exportentur4 facile omnibus terris antecellat. itaque haec
vobis provincia, Quirites, si et belli utilitatem et pacis
dignitatem retinere5 voltis, non modo a calamitate sed etiam
a metu calamitatis6 est defendenda.
[15]
nam in ceteris rebus
cum venit calamitas, tum detrimentum accipitur; at in
vectigalibus non solum adventus mali sed etiam metus ipse
adfert calamitatem. nam cum hostium copiae non longe
absunt, etiam si inruptio nulla facta est, tamen pecua7 relinquuntur8,
agri cultura deseritur, mercatorum navigatio conquiescit.
ita neque ex portu neque ex decumis neque ex
scriptura vectigal conservari potest; qua re saepe totius anni
fructus uno rumore periculi atque uno belli terrore amittitur.
[16]
quo tandem igitur9 animo esse existimatis aut eos qui vectigalia
nobis pensitant, aut eos qui exercent atque exigunt,
cum duo reges cum maximis copiis propter10 adsint, cum una
excursio equitatus perbrevi tempore totius anni vectigal
auferre possit, cum publicani familias maximas quas in
salinis11 habent, quas in agris, quas in portibus12 atque13 in custodiis
magno periculo se habere arbitrentur? putatisne vos
illis rebus frui posse, nisi eos qui vobis fructui sunt14 conservaveritis15
non solum, ut ante dixi, calamitate sed etiam
calamitatis formidine liberatos?
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 studiosius H: studio cett.
2 tuendas H: tutandas cett.
3 tam ita H
5 retinere HEWt: sustinere cett.
6 calamitatis om. t
7 pecua Servius ad Georg. iii. 64: pecora codd.
8 relinquentur Et
9 igitur H: om. cett.
10 propter Et: prope Hδ: om. π adsint HEς: adsunt btψ: absint codd. Vrsini
11 salinis saltibus Hotoman (de Cappadociae salinis cf. Plin. N. H. xxxi. 7, §§73, 77, 82)
13 atque in H: atque cett.
14 fructuosi sunt δ (contra Arusian. K. vii. 474)
15 conservaritis E: conservetis H (contra Arusian.)
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.