Click on a word to bring up parses, dictionary entries, and frequency statistics
[31]
Recte habita in causa partitio inlustrem et per-
spicuam totam efficit orationem. partes eius sunt
duae, quarum utraque magno opere ad aperiendam
causam et constituendam pertinet controversiam. una
pars est, quae, quid cum adversariis conveniat et quid
in controversia relinquatur, ostendit; ex qua certum
quiddam destinatur auditori, in quo animum debeat
habere occupatum. altera est, in qua rerum earum,
de quibus erimus dicturi, breviter expositio ponitur
distributa; ex qua conficitur, ut certas animo res te-
neat auditor, quibus dictis intellegat fore peroratum.
Nunc utroque genere partitionis quemadmodum con-
veniat uti, breviter dicendum videtur. Quae partitio,
quid conveniat aut quid non conveniat, ostendit, haec
debet illud, quod convenit, inclinare ad suae causae
commodum, hoc modo: ‘interfectam matrem esse a filio
convenit mihi cum adversariis.’ item contra: ‘interfec-
tum esse a Clytaemestra Agamemnonem convenit.’ nam
hic uterque et id posuit, quod conveniebat, et tamen
suae causae commodo consuluit. deinde, quid contro-
versiae sit, ponendum est in iudicationis expositione;
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.