39. ergo idcirco turpis haec
culpa est, quod duas res sanctissimas violat, amicitiam
et fidem. nam neque mandat quisquam fere nisi amico neque credit
nisi ei quem fidelem putat. perditissimi est igitur hominis simul et
amicitiam dissolvere et fallere eum
qui laesus non esset, nisi credidisset.
[113]
itane est? in minimis rebus
qui mandatum neglexerit, turpissimo iudicio condemnetur necesse
est, in re tanta cum is cui fama mortui, fortunae vivi commendatae
sunt atque concreditae, ignominia mortuum, inopia vivum1 adfecerit,
is inter honestos homines
atque adeo inter vivos numerabitur? in minimis privatisque rebus
etiam neglegentia in crimen mandati2 iudiciumque infamiae3 vocatur4,
propterea quod, si recte5 fiat, illum neglegere oporteat qui mandarit
non illum qui mandatum receperit; in re tanta quae publice gesta
atque commissa sit qui non neglegentia privatum aliquod commodum
laeserit sed perfidia legationis ipsius caerimoniam polluerit
maculaque adfecerit6, qua is tandem poena adficietur aut quo iudicio
damnabitur?
[114]
si hanc ei rem privatim Sex. Roscius mandavisset
ut cum Chrysogono transigeret atque decideret, inque eam rem fidem
suam, si quid opus esse putaret, interponeret, ille qui7 sese facturum
recepisset, nonne, si ex eo negotio tantulum in rem suam
convertisset, damnatus per arbitrum et rem restitueret et
honestatem omnem amitteret?
[115]
nunc non hanc ei rem Sex. Roscius mandavit sed, id quod multo
gravius est, ipse Sex. Roscius cum fama vita bonisque omnibus a
decurionibus publice T. Roscio8 mandatus est; et ex eo T. Roscius non
paululum9 nescio quid in rem suam convertit sed hunc funditus10
evertit bonis, ipse tria praedia sibi depectus est, voluntatem
decurionum ac municipum omnium tantidem quanti fidem suam
fecit.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 inopia vivum Halm: egestate vivum cod. lannoctii: om. mei: lac.Sylvius
2 in crimen mandati mei: mandati in crimen s, Puteanus
3 infamiae Puteanus: infamia (in fama σς) codd.: infame Lambinus
4 vocatur Lambinus: revocatur codd.
5 recte ratione 2 dett.
6 adfecerit asperserit Lambinus
7 ille qui illeque Madvig
8 T. Roscio Schütz: Roscio codd.: del. Hotoman
M. Tullius Cicero. M. Tulli Ciceronis Orationes: Recognovit brevique adnotatione critica instruxit Albertus Curtis Clark Collegii Reginae Socius. Albert Curtis Clark. Oxonii. e Typographeo Clarendoniano. 1908. Scriptorum Classicorum Bibliotheca Oxoniensis.
The National Endowment for the Humanities provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.