50.
[145]
praedia mea tu possides, ego aliena
misericordia vivo; concedo, et quod animus aequus est et1 quia
necesse est. mea domus tibi patet, mihi clausa est; fero. familia mea
maxima tu uteris2, ego servum habeo nullum; patior et ferendum
puto. quid vis amplius? quid insequeris, quid oppugnas? qua in re
tuam voluntatem laedi a me putas? ubi tuis commodis officio? quid
tibi obsto? si spoliorum causa vis hominem occidere, spoliasti3; quid
quaeris amplius? si inimicitiarum, quae sunt tibi inimicitiae cum eo
cuius ante praedia possedisti quam ipsum cognosti4? si metus5, ab eone
aliquid metuis quem vides ipsum ab se tam atrocem iniuriam
propulsare non posse? sin, quod6 bona quae Rosci7 fuerunt tua facta
sunt, idcirco hunc illius filium studes perdere, nonne ostendis id te
vereri quod praeter ceteros tu metuere non debeas8 ne quando liberis
proscriptorum bona patria reddantur?
[146]
facis iniuriam, Chrysogone, si maiorem spem emptionis tuae in
huius exitio ponis quam in eis9 rebus quas L. Sulla gessit. quod si tibi
causa nulla est cur hunc miserum tanta calamitate adfici velis, si tibi
omnia sua praeter10 animam tradidit nec sibi quicquam paternum ne
monumenti quidem causa reservavit11, per deos immortalis! quae ista
tanta crudelitas est, quae tam fera immanisque natura? quis
umquam praedo fuit tam nefarius, quis pirata tam barbarus ut, cum
integram praedam sine sanguine habere posset, cruenta
spolia detrahere mallet?
[147]
scis hunc nihil habere, nihil audere12,
nihil posse, nihil umquam contra rem tuam cogitasse, et tamen
oppugnas eum quem neque metuere potes neque odisse debes nec
quicquam iam habere reliqui vides quod ei detrahere possis. Nisi hoc
indignum putas, quod vestitum sedere in iudicio vides quem tu e
patrimonio tamquam e naufragio nudum expulisti. quasi vero
nescias hunc et ali et vestiri a Caecilia Baliarici13 filia, Nepotis sorore,
spectatissima femina, quae cum patrem clarissimum14, amplissimos
patruos, ornatissimum fratrem haberet, tamen, cum esset mulier,
virtute perfecit ut, quanto honore ipsa ex illorum
dignitate adficeretur, non minora illis ornamenta ex sua laude
redderet.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 est et Angelius: esset codd.
2 maxima tu uteris w: maximat uteris ς: maxima uteris cett.
4 cognovisti w, Halm
5 si metus Madvig: sin metuis codd.
6 quod Naugerius: om. codd.
7 Sex. Rosci Richter
11 causa reservavit ψ2: causa clare servavit cett.: causa clam reservavit pauci dett.
12 nihil audere del. Eussner
13 Baliarici Manutius: Baliaris codd.: Baliarici... sorore del. Garatoni
14 clarissimum patrem w, Halm
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.