Click on a word to bring up parses, dictionary entries, and frequency statistics
[3]
Χίου γὰρ μελλούσης προδίδοσθαι, τῶν ἀρχόντων
τις, συμπροδιδοὺς καὶ ἀπατῶν τοὺς συνάρχοντας
ἔπεισε λέγων, ὡς, ἐπειδὴ εἰρήνη εἴη, τοῦ τε
λιμένος τὸ κλεῖθρον εἰς γῆν ἀνασπάσαντας ξηρᾶναι
δεῖ καὶ πισσαλοιφῆσαι καὶ τὰ παλαιὰ τῶν νεῶν
ἄρμενα ἀποδόσθαι, τῶν τε νεωρίων ἐπεσκευάσθαι
τὰ στάζοντα καὶ τὴν ἐχομένην αὐτῶν στοὰν καὶ
τὸν πύργον, ἐν ᾧ διῃτῶντο οἱ ἄρχοντες, ἐχόμενον
τῆς στοᾶς, ἵνα ἐκ προφάσεως κλίμακες προπορισθῶσιν
τοῖς μέλλουσι καταλαμβάνειν τὰ
νεώρια καὶ τὴν στοὰν καὶ τὸν πύργον.